聖日門贏“波”冇甩拖

【本報消息】法甲巴黎聖日門力爭一勝洗頹，主場出擊鬥波爾多，大巴黎人腳佔優兼王子公園主場地利，有望睇好在低迷的波爾多身上，全取三分洗走歐冠出局頹勢。

聖日門出戰歐冠，大好機會下反勝為敗出局，更鬧出主力不和的傳聞。近五戰僅兩勝三負，士氣麻麻。不過在王子公園球場出戰聯賽，仍有十足保證，麥巴比掛帥配合美斯、尼馬進攻，聖日門近十六場聯賽主場不敗錄得十五勝一和，近五戰轟入十二球火力強勁。

在歐冠一戰防線演出捱批，門神拿華斯或重返正選，連同甘佩比等握守後防，面對陣容不整兼五戰不勝的波爾多，聖日門有望睇好重返勝軌。

馬賽進襲比斯特

作客比斯特繼續追趕次席的馬賽，季中開始表現回落，加上尼斯持續勇態，目前落後尼斯兩分跌落第三，但少一分的雷恩亦從後死追，馬賽為保前三，一分不能少。馬賽實力較對手好，前線米歷、皮耶特進攻牌面不俗。雖然比斯特近況不差，但主力缺陣損戰力。馬賽人腳佔優有力睇高一線全取三分。