三歌迷會聯乘新春圍爐

陳健安玩遊戲成MVP

為慶祝農曆新年，寰亞唱作歌手陳健安的“本原族”、梁釗峰的“峰心學院”和樂隊Nowhere Boys的“Nowhere Boys and Girls”三個歌迷會，破天荒聯乘舉行“2025新春圍爐BBQ暨Fans Gathering”，接近二百位粉絲聚首一堂，燒烤兼玩集體遊戲，好笑又熱鬧。

Nowhere Boys主音Van帶埋煮食用品，親自下廚為粉絲即場炮製韓式豬髀辛辣麵、芝士海鮮炒飯，粉絲排晒長龍，大受歡迎。他說：“我今朝用咗五小時熬咗豬髀拆肉，加埋薯仔整咗湯底，煲咗十嘜米，帶咗二十包麵，洗咗一大袋蜆，最後一滴汁都冇剩，好開心。”期間安仔加入做助手，表演單手打雞蛋和加芝士，還花式灑鹽，粉絲歡呼。此外，眾星各自帶了十幾份禮物讓粉絲抽獎，與眾同樂。

釗峰說：“多謝天公造美，好開心今日見到好多熟悉嘅面孔，亦有一啲新朋友，仲有一班好好嘅團隊同事，好感恩的一天，祝大家身心靈都健康！”這次活動粉絲都被叫中文全名，大家都覺得好像返回求學時期。就連Nowhere Boys的結他手Ken都玩埋一份，用自己中文全名打招呼和拜年：“我叫林宇翔，祝大家‘腸’道健康！”安仔發起全場叫他中文全名，又順勢笑說：“我贊成釗峰祝大家身心靈健康，便便都好重要口架！”

當日粉絲分十四圍爐，玩集體遊戲“偶像常識問答比賽”熱身，當中不乏古祖級難題考忠粉：亦有玩食字搞笑IQ題，粉絲為爭分數各出奇招，有上網搜查又有打電話問朋友。

之後玩鬥按計時器最接近十秒，當中釗峰只差○點○四秒獲最佳成績，全場嘩然。在“掟水樽”遊戲中，安仔勝兩局，笑言：“我平時除咗踢波同唱歌就係掟水樽，正職。”就連鬥遠睇字幕遊戲，他都又快又準，成為全晚MVP。