紅芽芋炆米鴨

唔知大家有冇留意到，每逢中秋節前後，街市就會見到好多檔口賣大芋頭或者紅芽芋。事關早秋係紅芽芋嘅當造期，唔少朋友都買嚟整返兩味，久而久之紅芽芋就變咗“食慾之秋”必備嘅一道菜式，更加係唔少家庭嘅中秋應節食品。

相信“芋頭炆鴨”都經常出現喺大家屋企嘅飯檯上，相當家常；其實炆鴨嚟講，咁多種芋頭裏面老周我就最鍾意用紅芽芋，貪佢食落香滑糯口。紅芽芋買返嚟之後唔好即刻煮，先洗淨啲泥，然後拎去有陽光又唔太熱嘅地方吹曬幾日，之後燜煮出嚟嘅紅芽芋會更加軟糯，用嚟炆米鴨就一流啦。

今期就教大家整返味時令嘅紅芽芋炆米鴨，材料有：米鴨一隻、紅芽芋一斤、南乳一件、磨豉醬半茶匙、葱蒜片一茶匙、蠔油一茶匙、糖半湯匙同酒一湯匙。做法相當簡單，首先將米鴨切件落鑊爆香，加入葱蒜同其他配料，之後放水直至浸過材料，再燜二十分鐘。紅芽芋先煮熟，去皮開二，再放入煮熟鴨肉一齊燜煮多兩分鐘，上碟嘅時候鋪返些少芫荽、葱喺面頭就可以。

（澳門美高梅金殿堂烹飪顧問）

周 中